Ledicia Costas: "Ler ten que ser tamén un exercicio de diversión"

Vigo

Unha partida en liña a un videoxogo que acabou coa proposta de colaboración nun libroxogo entre Ledicia Costas e o guionista Luismi Pérez. E así nace Bruxas e Dragóns, que nos evoca a aqueles libros de Dragones e Mazmorras que, entre outras cousas, propoñíannos xogar ademais de ler. Como aqueles libros de Elixe a túa propia aventura nos que uno elixía o camiño para seguir polos personaxes da novela na que estaba inmerso; nos que había varios finais e non sempre tiñas que chegar a el polo mesmo camiño. Neste novo libro, Baba Yaga, van poder atopar 52 finais diferentes. Este é o primeiro dunha triloxía que queren sacar adiante, a catro mans, tanto Ledicia Costas como Luismi Pérez, sen esquecernos das ilustracións de Bea Gregores. A editorial Triqueta apostou fortemente por este proxecto cunha coidada edición. Ledicia Costas suma e segue. Contounos tamén novidades coma Infamia traducido ao alemán, e varias das súas obras que tamén terán estrea en croata, turco ou checo.