O GDR Costa da Morte presenta en Baio os vídeos do proxecto “Tierra de Oportunidades 2025”
O encontro reuniu medio cento de persoas e puxo en valor o emprendemento e as posibilidades de financiamento no rural
Zas
O Centro Sociocultural de Baio acolleu este 2 de decembro o acto oficial de presentación dos vídeos do proxecto “Tierra de Oportunidades 2025 – Costa da Morte”, impulsado polo GDR Costa da Morte co apoio de CaixaBank. Preto de 50 persoas asistiron a unha xornada centrada no emprendemento rural e nas oportunidades de desenvolvemento económico da comarca.
O evento comezou cunha intervención do xerente do GDR, José Antonio Vila García, quen explicou as liñas principais do programa. A continuación tomou a palabra o representante de CaixaBank, Rafael Suárez Pais, que destacou o compromiso da entidade con iniciativas que favorezan a dinamización do territorio.
A sesión incluíu tamén unha mesa redonda sobre axudas públicas, moderada por Dolores Pena (Afiprodel), na que participaron responsables de distintos organismos vinculados ao desenvolvemento local: Rosa Sánchez (Concello de Vimianzo), Guillermo González (GALP Costa da Morte) e o propio Vila García. Durante o debate analizaron as ferramentas de financiamento dispoñibles e os desafíos que afronta o rural en materia económica e social.
O momento central da xornada foi a proxección dos vídeos do proxecto, coa participación de varios emprendedores implicados: Ana Trasariz, Casa da Marola, Despensa D’Lujo, Espazo Nature e Lar de Canedo. Os protagonistas presentaron brevemente os seus proxectos e puxeron en valor o papel da innovación e da iniciativa empresarial como motores de transformación.
O presidente do GDR, Manuel Muíño Espasandín, foi o encargado de pechar a sesión agradecendo o apoio de CaixaBank e resaltando o potencial do emprendemento para impulsar o futuro da Costa da Morte. A xornada rematou cun espazo de intercambio entre asistentes acompañado dun aperitivo.
Co desenvolvemento deste acto, o GDR Costa da Morte reforza o seu labor de acompañamento ao tecido emprendedor e a difusión de exemplos inspiradores que contribúen a un rural máis dinámico e sostible.
