“Se XEAL pagase licenza de obra teríamos un millón máis, pero como é un proxecto estratéxico está exento. Nos cun millón de Euros seríamos os reis do mambo”

O alcalde de Dumbría, Raúl González, empeza facendo unha valoración positiva do tempo que leva como alcalde, pero non quere ser conformista e asegura que hai marxe de mellora.

Entre os proxectos que están en marcha, destaca o PAI, Punto de Atención á Infancia, de Berdeogas, espera poder rematalo antes de acabar o mandato. Respecto ao saneamento de Olveiroa, o alcalde conta con que estea funcionando o vindeiro verán. Unha obra duns 300.000€ de investimento. Recordou que as obras da estrada entre Hospital e Brens vai retomarse pronto.

González amosa a súa satisfacción coa situación económica municipal, sen débeda cos bancos, con unha importante cantidade de remanente e espera continuar cae sen cobrar taxas. En xaneiro levará a pleno o novo orzamento.

O alcalde critica que obras tan importantes como a nova planta de carbón vexetal de XEAL estean exentas do pago de licenza de obra.

Destaca tamén o alcalde o Servizo de Axuda no Fogar SAF, un dos máis baratos da zona e que ofrece directamente o municipio sen convenios con empresas externas. Neste momento dispoñen de 3 Casas do Maior.

Ao igual que outros concellos, o acceso á vivenda é un problema para fixar poboación, a localidade máis cara do concello é O Ézaro. Nesta localidade dispoñen dunhas 200 camas para uso turístico.

Un proxecto que non rematará neste mandato é o PXOM, necesario para regular a proliferación de Vivendas de uso turístico.