Évame Oroza acolle o "Vigo Acendido", un convite ao recollemento "lonxe do ruido do Nadal"

A cidade de Vigo acenderase este venres, 5 de decembro, ás 18:30 horas, cunha proposta diferente para vivir o inverno e o Nadal. A Asociación Évame Oroza será a anfitrioa da inauguración de "Altares da Cidade", un proxecto que forma parte da iniciativa colectiva "Vigo Acendido".

"Vigo Acendido" é unha rede de altares colectivos espallados por diferentes espazos culturais, librarías, asociacións e cafés da cidade, co obxectivo de recuperar o sentido simbólico e comunitario do inverno. A proposta busca crear pequenos lugares de recollemento e conexión, afastados do "ruído, do consumo e da espectacularización do espazo público".

Un altar "para soltar e invocar"

O altar colectivo acollido por Évame Oroza invita á cidadanía a crear "pequenos espazos de pausa e sentido no corazón do inverno".

No altar, as persoas poderán deixar unha palabra, un poema, ou un pequeno obxecto, podendo acompañalo dunha nota explicativa. Trátase dun xesto simbólico, un espazo para ofrecer:

• Algo que se queira soltar
• Algo que se queira invocar
• Un desexo para o novo ciclo que vai "das sombras cara a luz"

Con esta acción comeza "unha conversa sen palabras entre as xentes da cidade". A cita é este venres, 5 de decembro, ás 18:30 horas.