Camariñas inicia a contratación da primeira fase do Museo dos Naufraxios na Lonxa Vella

O Concello de Camariñas iniciou este martes a contratación das obras da primeira fase do futuro Museo dos Naufraxios, que terá a súa sede na Lonxa Vella. O orzamento total da actuación ascende a 430.000 euros, dos que a Deputación da Coruña achega 330.000 euros a través dunha subvención nominativa, o que supón o 76,7% do custo total. As empresas interesadas en executar as obras teñen de prazo ata o 4 de abril para presentar as súas ofertas.

Este proxecto, que sufriu modificacións con respecto ao inicial, é o resultado da loita do Concello por rehabilitar o inmoble tras recibir un informe que recomendaba o seu derrubamento. O Concello demostrou que o edificio estaba en condicións estruturais de renovarse, dado o seu alto valor sentimental para a vila. A actuación inclúe a reparación e consolidación dos elementos estruturais da Lonxa Vella, así como a reforma da envolvente exterior co fin de recuperar o edificio e evitar o seu deterioro.

Unha vez rematados os traballos no exterior, rehabilitarase unha zona da planta baixa onde se acondicionarán os servizos e o espazo de uso público destinado á Sala de Exposición 'Beti Donosti'. Ambos espazos estarán comunicados entre si a través dunha zona común con acceso desde o exterior. Nesta primeira fase non se acondicionará a planta alta: só se demolerán as escaleiras, os tabiques e os acabados existentes.

Será nunha segunda fase cando se aborde o acondicionamento interior do Museo dos Naufraxios, deseñando e compartimentando a planta alta xunto coas dúas ás da Lonxa na planta baixa. O Museo dos Naufraxios está chamado a converterse nun dos principais recursos culturais e turísticos de Camariñas e da Costa da Morte.