Falece Fernando Cabeza Quiles nun accidente de bicicleta

Carballo

O escritor Fernando Cabeza Quiles faleceu este venres nun accidente de bicicleta rexistrado no concello de Carballo. O sinistro produciuse pouco despois da unha do mediodía na parroquia de Ardaña, a escasa distancia da Ponte Rosende. Foi unha persoa particular quen deu o aviso ao 112 tras atopar o ciclista no chan, inconsciente. Ata alí acudiron efectivos da Garda Civil, Protección Civil e sanitarios do 061, que só puideron confirmar o falecemento. A mobilización do helicóptero medicalizado quedou finalmente sen efecto.

Segundo as primeiras indagacións, todo apunta a unha caída accidental, sen que interveñan outros vehículos, polo que se descarta inicialmente un atropelo. Os axentes tratan agora de esclarecer se a vítima sufriu algún problema de saúde previo ou se perdeu o control da bicicleta de maneira repentina. As causas poderán aclararse na autopsia á que será sometido no Instituto de Medicina Legal de Galicia. Cabeza Quiles, de 73 anos, era unha figura destacada da cultura na Costa da Morte, profesor retirado e autor recoñecido polos seus estudos sobre toponimia.