Como se afronta o dó en datas sinaladas?

Lugo

Jorge Balado, xerente do tanatorio Serfuja, teno claro: a pesar de non haber fórmulas máxicas, cada persoa debe atopar a súa propia forma de xestionar o dó. Cando chega un Día do Pai no que é a primeira ocasión na que el xa non está presente, convén talvez acudir aos bos recordos e facer aquilo que á persoa ausente lle gustaba, a modo de homenaxe. O obxectivo ha de ser normalizar a situación e deixar se é preciso que afloren as emocións (a dor forma parte do amor cara á persoa que se foi) e ser conscientes de que o primeiro ano é sempre o máis complicado, xa que se viven por primeira vez situacións e datas marcadas no calendario que adoitaban ser compartidas coa persoa falecida e, por tanto, a súa ausencia faise máis dura. A dor forma parte natural do dó, e non debemos sentirnos mal por botar de menos a quen falta.