Rematada máis da metade da obra de dragaxe no porto de Laxe
Dragado do Porto de Laxe / Radio Nordés
Laxe
O presidente Xunta visitou hoxe o porto de Laxe para comprobar a fase final das obras de dragaxe que se están realizando por segundo verán consecutivo. Feijóo asegurou que estes dragaxes son obras difíciles e complexas pero moi necesarias “para dar seguridade á xente que traballa no porto e dar máis capacidade de captura e comercialización”.
Salientou que esta obra, que conta cun orzamento de 3,6 millóns de euros, está completada nun 50% e está previsto que remate nuns meses se as condicións meteorolóxicas o permiten.
O presidente explicou que a Xunta realizará estudos para dragaxes en 30 portos autonómicos.
Feijóo incidiu no proxecto de posta en valor e promoción da lonxa de Laxe que contribúe a dar visibilidade aos produtos da pesca costeira artesanal, á forma de vida dos mariñeiros e á cultura mariñeira. A maiores a adquisición de material expositivo permitirá realizar eventos e exposicións itinerantes e está previsto crear un gran mural na fachada sur da lonxa.
Tamén están en execución obras para mellorar a eficiencia enerxética da lonxa e da fábrica de xeo da confraría cun proxecto de instalación de paneis fotovoltaicos e estase a fornecer a lonxa de dúas máquinas hidrolimpadoras.
