Debate a tres en Oroso nas primeiras municipais en dúas décadas sen Manuel Mirás na alcaldía
Os candidatos de PSOE, PP e BNG debaten no Hoy por Hoy Santiago no ecuador da campaña
Debate en Oroso nas primeiras municipais en dúas décadas sen Manuel Mirás na alcaldía
32:28
Compartir
El código iframe se ha copiado en el portapapeles
<iframe src="https://cadenaser.com/embed/audio/460/1684511203033/" width="100%" height="360" frameborder="0" allowfullscreen></iframe>
Debate a tres no salón de plenos do concello de Oroso, en Sigüeiro, ante unha cita electoral que neste municipio ten varias novidades. É a primeira vez que o actual alcalde, o socialista Luis Rey, é cabeza de cartel nunhas eleccións despois da marcha ó Senado do veterano Manuel Mirás. Hai catro anos, a maioría absoluta escapou por un puñado de votos o que fixo que o PSOE sumara os seus 6 concelleiros co que obtivo o BNG de Isabel Fernández. A estas eleccións concorre tamén Álex Doval como candidato do Partido Popular. É a terceira vez que o intenta. Exerce de portavoz do PP no concello dende 2015. Nesta ocasión, Oroso Renovable, que hai 4 anos tivo 2 concelleiros, non se presenta e non asistiu ó debate Jaime Carneiro de Alternativa Oroso, nova formación nesta convocatoria, porque o criterio que aplicamos para o debate foi que os participantes xa tiveran representación no municipio.
¿Manterá Luis Rey o tirón de Manuel Mirás? ¿Acadará a maioría absoluta? ¿Dará o PP de Alex Doval a sorpresa? ¿Que efecto terá no reparto de concelleiros a nova formación Alternativa de Oroso? Son preguntas que terán resposta o día 28.
No debate no programa Hoy por Hoy Santiago houbo unanimidade entre PSOE, PP e BNG nun asunto, a necesidade de ampliar o polígono industrial San Martiño II. Dese xeito "haberá máis empresas que se ubiquen no concello e creen postos de traballo", sinalou Luis Rey.
O candidato socialista puxo en valor que o concello está saneado, que ten un orzamento de 8.300.000 euros e case dous millóns de inversión cun aumento de gasto en todas as partidas.
O candidato do PP, Alex Doval apostou por outorgar axudas directas para comprar no concello e a hostalería local. Tamén defendeu a necesidade de que o sector hostaleiro se una para crear unha asociación e organizar actividades dinamizadoras.
Dende o BNG, Isabel Fernández insistiu na necesidade da gratuitidade do tramo da AP9 entre Sigüeiro e Santiago para favorecer o asentamento de empresas no municipio.
Con respecto ós investimentos da Xunta de Galicia no concello tiveron lugar os momentos máis tensos do debate. O candidato do PP, Alex Doval, afeou ó alcalde e cabeza de cartel socialista que non solicitara os obradoiros de emprego da Xunta nos últimos dez anos. Luis Rey respostou que o goberno galego sempre da un "non por resposta" cando as iniciativas parten do concello de Oroso e botoulle en cara a Doval a situación do CEIP de Sigüeiro, centro escolar que necesita unha profunda remodelación que leva moitos anos agardando sen que a consellería de Educación atenda esa necesidade.
Con respecto á mobilidade, quedou claro que o transporte metropolitano impulsado pola Xunta é manifestamente mellorable. "Non pode ser un autobús cada catro horas, ten que ter frecuencias constantes para atender a estudantes e traballadores", afirmou Luis Rey. Isabel Fernández lembrou que "o monopolio de Monbús é un problema". Álex Doval recoñeceu que en núcleos como Porto Avieira o transporte metropolitano non satisfai as necesidades da veciñanza.