Perfil de Iván Rivas | Un soñador ao que lle gusta todo de Ferrol, até as súas imperfeccións

Ferrol

A procura da verdade, a curiosidade, a motivación polas cousas e a vontade de cambio son o motor que move a Iván Rivas, candidato do BNG á Alcaldía de Ferrol. Unha persoa tímida, segundo a súa familia e amizades, mentres que el considérase reservado, soñador e libre.

Rivas atopa a felicidade en poder decidir, até certo punto, en que empregar a vida. Pola contra, esa felicidade desvanécese ante as situacións de impotencia. Que é o que máis lle gusta de Ferrol ao candidato do Bloque? Asegura que todo, até as súas imperfeccións. Aínda que admite que á cidade fáltalle saír da atonía.

Marmadeiro é o lugar predilecto de Iván Rivas dentro de Ferrol e fóra da cidade quédase ben preto, en Cedeira. A un pouco máis lonxe, pero tampouco moito, lévanlle as lembranzas dos veráns da infancia, atesouradas na montaña de Lugo e no tempo de lecer co seu curmá e co seu irmá.

A película favorita do candidato nacionalista é Aftersun; a serie The Newsroom; un libro A Montaña máxica e a canción Tempestades de sal. Se Iván Rivas tivera un orzamento ilimitado, a quen traería ás Festas de Verán de Ferrol? A Fillas de Casandra, Baiuca ou A Garota Não e algo que lle recomende Pepe Cunha.