Activan a prealerta por escaseza moderada de auga no río Grande en Camariñas e mantense no Anllóns
No concello da Laracha non descartan cortes temporais
MONICA ARCAY CARRO
Costa da Morte
O xerente de Augas de Galicia, Gonzalo Mosqueira, presidiu a reunión da Oficina técnica da seca, na que participan Protección Civil, Meteogalicia, a Consellería de Medio rural e a Consellería de Sanidade. Entro outras decisións, os técnicos decidiron activar a prealerta por escaseza moderada de auga no treito final do río Grande en Camariñas, así como a de prolongar a prealerta no río Anllóns.
A situación de prealerta implica a realización dun seguimento intensivo da situación meteorolóxica e os niveis de ríos, encoros e acuíferos, así como das posibles incidencias que se detecten. Ademais prevense medidas de concienciación da cidadanía.
No concello da Laracha non descartan cortes temporais do subministro de prolongarse a actual situación. Nas últimas horas veñen de analizar os puntos de captación e insisten na necesidade de que a poboación cumpra coas medidas de aforro de auga e consumo responsable. Na mesma liña actuou o concello de Carballo, solicitando que se reduza o consumo de auga por parte da cidadanía, son consellos tan básicos como non lavar o coche ou non encher as piscinas.
