Malpica expropiará unha parcela para o centro de saúde mentres segue sen data para a apertura do centro de día

Costa da Morte

O alcalde de Malpica estivo hoxe en radio Nordés para participar no Pleno Aberto, un espazo no que os rexedores analizan a actualidade do seu municipio e contestan ás preguntas dos grupos da oposición.

Parga falou da relación co tenente alcalde Alfredo Cañizo e da polémica coa asociación de Oleiros. O alcalde asegura que intentará organizar directamente dende a alcaldía a vindeira Mostra xunto cos oleiros, pero aínda ten que falalo con Cañizo. Aínda que ten discrepancias co tenente alcalde, considera que os oleiros tampouco poden pedir que bote do goberno a un concelleiro.

Parga defendeu a situación económica municipal que conta con superávit e anunciou que van mercar varias parcelas para distintas actuacións. Con respecto ao futuro centro de saúde asegurou que, finalmente, van expropiar a parcela onde se vai construír. O alcalde tamén falou co futuro centro de día para o que aínda non hai data para a apertura. Con respecto ao PXOM dixo que terán que contratar unha nova empresa para reiniciar os traballos.

Os partidos da oposición tamén preguntaron neste Pleno Aberto, o voceiro do BNG, Miguel Varela, preguntou pola polémica acusación que fixo no último pleno sobre o ex alcalde, ao que acusou de roubar, mesmo de levarse unha impresora do concello.

O grupo socialista preguntou por medio do seu voceiro, Walter Pardo, cando o alcalde ía deixar de mentir.