O Entroido xa é Ben de Interese Cultural
O Diario Oficial de Galicia publica o inicio do proceso para a súa declaración, que conleva xa a máxima protección
A Coruña
Xa se publicou no Diario Oficial de Galicia o inicio do procedemento para a protección do Entroido de Galicia como Ben de Interese Cultural (BIC). O proceso terá unha duración máxima de 24 meses, pero a protección como BIC xa está vixente desde a publicación de hoxe.
A declaración faise en sentido amplo, argumentando que o 61 % dos concellos galegos —191 dos 313— escollen unha data vinculada ao Entroido como festivo local. Tamén destaca a riqueza e diversidade destas festas, reflectida mesmo na variedade das súas denominacións: Antroido, Antroiro, Antroito, Antruido, Carnaval, Entroiro, Entrudio, Entrudo, Entruido e Introido.
A Consellería de Cultura considera o Entroido como un “elemento central” do patrimonio inmaterial de todo o pobo galego, necesario para comprender e definir a identidade de Galicia. A apertura deste proceso compromete as administracións á súa protección e promoción.
A resolución da Dirección Xeral sinala que o Entroido xa está amparado polo seu interese etnolóxico, a súa función social e a riqueza cultural e patrimonial que representa. Tamén subliña a súa capacidade para xerar riqueza no ámbito local, fortalecer a convivencia e ofrecer alternativas de entretemento. Recóllense ademais expresións propias como as máscaras tradicionais e os mecos.
