Oliveira dos Cen Anos, premio Mestre Mateo 2024

Vigo

O himno do Centenario do Celta non deixa de recibir recoñecementos. «Oliveira dos Cen Anos», o videoclip producido por C. Tangana, foi galardoado co premio Mestre Mateo 2024 na XXII edición que se celebrou este sábado no Coliseum da Coruña.

"Se esta obra serve para que a xente descubra a beleza da nosa lingua, se abra á nosa cultura, se sinta orgullosa e conecte coas nosas raíces, será unha das vitorias máis importantes", aseguraba Gael García no seu discurso ao recoller o galardón. "Todo un recoñecemento á nosa historia, á nosa tradición, aos nosos 100 anos de Afouteza e Corazón. E o máis valioso, un recoñecemento para todo o celtismo".

O videoclip oficial, que xa conta con 3,6 millóns de reproducións desde a súa publicación na plataforma de Youtube, segue a colleitar éxitos, desta vez na gala do audiovisual máis importante de Galicia. Producido por RC Celta, C. Tangana e Little Spain, compartía nominación na categoría de Mellor Videoclip con «Ruando» de Mondra, «Fai tempo» de The Rapants e «A pequena morte» de Caamaño e Ameixeiras.

Esta fin de semana tamén se soubo que o himno foi nomeado nos prestixiosos Football Business Awards 2024, premios que recoñecen a parte máis empresarial do fútbol. A produción de RC Celta, C. Tangana e Little Spain está nomeada nas categorías de Mellor campaña dun club e Mellor compromiso dun club cos afeccionados.