“O Papuxa” convértense en plató para rodar “As maos das pulpeiras”
A curtametraxe de Matriuska Producciones pon en valor o traballo das pulpeiras e o “pulpo”, “gran maridaxe co viño do Ribeiro”
Imaxe da rodaxe. / Cadena SER
Ribadavia
Ás rúas de Ribadavia non lle fan falta demasiado para ser un bo plató de rodaxe. “Temos un Casco Histórico digno de película”, expresaba o alcalde de Ribadavia, César Fernández, esta mañá durante a visita ao equipo técnico e artístico da curtametraxe “As maos das pulpeiras”. Con guión de Duarte Caseiro e dirixida por Silvia Cachafeiro, é a nova produción de Matriuska Producciones, que xa rodou outros filmes de éxito como “Matria”.
César Fernández, alcalde de Ribadavia, xunto á concelleira de Cultura, Yolanda Gómez e responsables doutras das localidades achegadas nas que transcorren as filmacións da curta, como Patricia Torres, alcaldesa de Boborás, ou Diego Fernández, concelleiro de O Carballiño; e acompañados por Jacobo Sutil, director da AGADIC, visitaron a rodaxe que estos días se está a realizar en Ribadavia.
Daniel Froiz, CEO de Matriuska Producciones, e o resto do elenco técnico e artístico da curta atópanse gravando nas rúas de Ribadavia e nun lugar icónico da vila: O Papuxa, unha taberna moi coñecida da localidade que se sitúa en pleno casco histórico e que leva nas mans de numerosas xeracións dunha mesma familia.
“Para Ribadavia é un orgullo contar con filmacións cinematográficas. É unha oportunidade de dar a coñecer a nosa vila, cunha historia única. Ademais, este filme centrado nas “pulpeiras” serve tamén para pór en valor outro dos tesouros do noso concello: o Viño do Ribeiro, que é a maridaxe perfecta cun bo ‘pulpo’”, explicou o alcalde, César Fernández. De feito, a última edición da Festa do Pulpo, do Carballiño, estivo adicada ao viño do Ribeiro.
O director da AGADIC, Jacobo Sutil, resaltou o bo momento no que se atopa o audiovisual galego, que ademais aposta por proxectos feitos en Galicia, con historias propias, pero “cun horizonte internacional. Estamos na fermosa vila de Ribadavia que en si mesma é un escenario de rodaxe e esta curta, centrada na provincia de Ourense, de seguro terá un percorrido despois por festivais e pantallas e que vai servir para que moita xente aprecie o que temos: as nosas paisaxes, a nosa cultura e a nosa lingua”.
