"Antes de Nós": o Castelao máis íntimo chega ao cine

A Coruña

A Coruña acolle este serán o preestreo de Antes de Nós, unha longametraxe que chegará aos cines de Galicia este venres, coincidindo co Ano Castelao 2025, no que se conmemora o 75 aniversario do pasamento dunha das figuras máis senlleiras da cultura galega. A cinta, dirixida por Ángeles Huerta, con guión de Pepe Coira, afonda na dimensión máis íntima e humana de Alfonso Daniel Rodríguez Castelao, lonxe dos retratos mitificados aos que estamos afeitos.

Un Castelao humano e novo

"Antes de Nós" non é un biopic tradicional. A directora Ángeles Huerta explica que se trata dun exercicio de “secularización de Castelao”, no que se busca achegar o personaxe á súa dimensión humana, sen por iso desmerecer a súa importancia histórica e política. A través da interpretación de Xoan Forneas como Castelao e Cris Iglesias como Virginia Pereira, o filme explora dous episodios clave na súa vida: o seu traballo como médico en Rianxo durante a gripe de 1918 e o seu viaxe a Bretaña en 1929 xunto á súa muller, tras a morte do seu fillo.

Virginia Pereira, unha figura a redescubrir

A película ofrece tamén unha oportunidade para visibilizar a figura de Virginia Pereira, compañeira vital e intelectual de Castelao. Segundo Huerta, o filme retrata "un baile continuo de achegamento e separación desta parella ao longo dos anos", revelando a forza dun vínculo que se consolidou trala traxedia persoal. “Poucas parellas sobreviven á perda dun fillo, e eles uníronse aínda máis”, sinala a directora.

Cine galego feito en galego e con raíces coruñesas

Ademais de contar cun equipo artístico e técnico galego, Antes de Nós ten unha pegada especial na cidade herculina: Ángeles Huerta é coruñesa de adopción e Cris Iglesias, a actriz que interpreta a Virginia, tamén é natural da Coruña. A fotografía corre a cargo de Lucía C. Pan, e a banda sonora está asinada por Sofía Oriana Infante e as BoubaS, un grupo de cantareiras da zona de Ordes.

Chamamento ao público: ir ao cine a primeira fin de semana

A directora fixo un chamamento explícito ao público galego para acudir aos cines na primeira fin de semana de estrea, xa que a continuidade da película nas carteleiras dependerá dese apoio inicial. "As películas pequenas, galegas e en galego, precisan do impulso do público desde o primeiro día", subliña Huerta.

Un filme que convida á reflexión sobre Galicia e a identidade

"Antes de Nós" é tamén unha achega á conversa aberta sobre o que queremos ser como país, asegura Huerta. Mostrando un Castelao novo, ardente e soñador, o filme pregúntase como se conforma unha ética política desde a vivencia íntima, e propón unha Galicia onde "todo é posible".