Arrinca a XXV Festa do Esquecemento

Esta edición especial, que conmemora os 25 anos de traxectoria da festa, contará con máis de 50 actividades gratuítas repartidas por todo o centro da vila: campamento, praza Maior, parque do Toural, casco vello e outros espazos de Xinzo, que se encherán de vida durante a fin de semana.

Un dos grandes atractivos, segundo informa o Concello, será o regreso do Gran Circo Romano, que se desenvolverá o sábado pola tarde sobre un terreo de 1.500 metros cadrados de area. Nel recrearanse carreiras de cuadrigas, combates de gladiadores e diferentes espectáculos, con gradas habilitadas para o público, que terá preferencia se acode vestido de época.

A música, os desfiles, as teatralizacións, as animacións de rúa e a participación de numerosos grupos de recreación histórica completarán unha programación deseñada para atraer tanto á veciñanza como a visitantes de toda Galicia e do norte de Portugal.

Esta edición terá unha vertente solidaria xa que os fondos recadados coa venda de merchandising destinaranse a apoiar aos territorios afectados polos incendios forestais nas últimas datas.