"San Simón" anuncia a súa chegada aos cinemas galegos o 24 de outubro tralo seu paso por San Sebastián
A película sobre o campo de concentración de San Simón exhibirase no OUFF antes da súa estrea comercial
"San Simón" chega aos cines de Galicia o 24 de outubro
A estrea de San Simón, a película de Miguel Ángel Delgado, xa ten data de chegada aos cinemas galegos: o vindeiro 24 de outubro. O anuncio chega xusto un día antes da súa esperada estrea internacional no prestixioso Festival de San Sebastián, onde a obra se presentará na sección Made in Spain este xoves 25.
A expectación é máxima, xa que as entradas para os pases do xoves e venres na cidade vasca están esgotadas desde hai días, o que reflicte o interese que espertou este filme.
Única película en galego no Festival de Donosti
A película, a única en galego presente no Festival de San Sebastián, conta a historia do campo de concentración franquista na illa de San Simón, na ría de Vigo. A trama narra a memoria das vítimas, sete anos despois da súa creación en outubro de 1936. O propio director, Miguel Ángel Delgado, describe a illa como unha "metáfora do que pretendía crear o fascismo: unha inmensa prisión".
Rodada en localizacións orixinais, o filme mestura actores profesionais con familiares dos presos, construíndo un relato potente e conmovedor que afonda nos conceptos de democracia, dignidade e liberdade.
Pase no OUFF
Antes de chegar á gran pantalla, San Simón tamén terá un pase especial no Festival de Cine Internacional de Ourense. Será o vindeiro 2 de outubro, na sección Panorama Galicia, dando unha nova oportunidade ao público para achegarse a esta produción antes da súa distribución comercial.
O filme é unha coprodución entre San Simón la película AIE, Miramemira, Morelli Producciones e a portuguesa Bando à Parte. Conta coa participación de RTVE, Televisión de Galicia e RTP, ademais de financiamento de institucións como o ICAA e a AGADIC. A distribución correrá a cargo de Baños Films e Linde Films. Con todo este apoio, San Simón consolídase como unha das estreas cinematográficas máis agardadas do outono, prometendo ser unha obra clave para a recuperación da memoria histórica en Galicia e no resto do país.
