Galaxia pecha un ano de aniversario épico en Vigo coa exposición "Crear Porvir"

Vigo

Vigo convértese no colofón das celebracións polo 75 aniversario da Editorial Galaxia (1950-2025) coa inauguración da exposición "CREAR PORVIR. 75 ANIVERSARIO EDITORIAL GALAXIA (1950-2025)". A mostra, que xa pasou polas outras seis cidades galegas, ábrese ao público o xoves 4 de decembro, ás 19:15 horas, na Sede de Afundación, onde permanecerá ata o 10 de xaneiro de 2026.

A chegada a Vigo pon o ramo a un ano cheo de iniciativas que subliñaron o papel fundamental da editorial na evolución cultural da Galicia contemporánea.

A exposición: un percorrido pola historia e o futuro

A mostra "CREAR PORVIR", comisariada polo catedrático e presidente da RAG, Henrique Monteagudo, xunto a Malores Villanueva Gesteira e Xosé Manuel Dasilva Fernández, percorre a traxectoria da editorial, dende a súa fundación en 1950 ata hoxe.

Destácase o labor de fundadores como Otero Pedrayo, Ramón Piñeiro ou Francisco Fernández del Riego, e autores clave como Castelao, Carlos Casares, Xohana Torres, Manuel Rivas, Domingo Villar ou Yolanda Castaño, entre máis de 1.500 autores que publicaron preto de 3.500 títulos.

A exposición artéllase en catro eixes: a literatura galega (do Rexurdimento ao novo milenio), o ensaio e o pensamento (con Grial como proxecto de referencia), a tradución e proxección internacional, e a literatura infantil e xuvenil.

O estudo Desoños concibiu un bosque de estruturas móbiles e un túnel do tempo para sinalar os fitos máis salientables da editorial.

Galaxia, recoñecida coa Medalla de Ouro de Galicia e o Premio da Cultura Galega, consolídase como un proxecto esencial que aposta firmemente pola dignidade e a normalización da lingua e cultura galegas, investindo os seus beneficios na propia empresa.

Un ano de fervedoiro cultural

O 75 aniversario de Galaxia despregou un ambicioso programa de actividades, entre as que destacan:

• Foros de debate: Celebración dos foros da revista Grial baixo o título “Galicia 2050. Pensar cara adiante”.
• Campaña escolar: A campaña “A Biblioteca Galáctica contra a IA fantástica”, a cargo da compañía Tanxarina, que levou o teatro a máis de 23 localidades e na que participaron máis de 3.500 escolares.
• Documental e mostras: A estrea en Santiago dun documental dirixido por Ana Viqueira e Diego Frey e a organización da mostra “Galaxia-Auria. 75 anos despois 1950-2025” en Ourense.
• Novidades editoriais e premios:
• Lanzamento da Biblioteca 75, con 10 títulos senlleiros.
• Publicación de “Unha galaxia viguesa”, de Marcos Calveiro, para os centros de ensino de Vigo.
• Convocatoria do I Premio Xosé Neira Vilas de literatura xuvenil, outorgado a Gabriel Romero de Ávila.
• Convocatoria extraordinaria do Premio Galaxia de Novela 75 anos, o de maior dotación económica, que gañou Fernando Castro Paredes con O lanzador de coitelos.