A rúa Rosalía de Castro de A Guarda será peonil a partir de 2026

O Concello da Guarda anunciou este mércores unha das súas intervencións urbanísticas máis relevantes para o vindeiro ano: a peonalización da rúa Rosalía de Castro, no entorno da céntrica Alameda. A obra, que se iniciará co comezo de 2026 e está previsto que remate a mediados dese mesmo ano, busca a mellora, recuperación e optimización do espazo para o uso exclusivo dos peóns.

Este tramo de Rosalía de Castro é un punto de gran concentración de actividade diaria, sendo un itinerario clave que conecta o núcleo urbano con servizos esenciais como o Centro de Saúde, o Centro Cultural, diversos centros escolares e a piscina municipal.

Ademais, atópase ao carón dunha das principais zonas de xogos infantís e é parte do Camiño de Santiago ao seu paso entre Camposancos e A Guarda.

Seguridade e natureza

O proxecto non só persegue a mellora da accesibilidade e seguridade neste punto de paso fundamental, senón que tamén aposta por humanizar a contorna. Coa peonalización, instalaranse zonas de sombra e zonas verdes, xunto con novo mobiliario urbano como bancos e xardineiras, primando o espazo para as persoas.

Ademais da transformación superficial, a intervención inclúe a renovación integral das infraestruturas subterráneas, abarcando o sistema de saneamento e canalización, así como a mellora dos elementos de drenaxe e iluminación.

O alcalde da Guarda, Roberto Carrero, subliñou a importancia desta actuación no marco dunha estratexia máis ampla de mellora urbana. “Queda de manifesto a nosa aposta por mellorar o entorno do casco urbano”, declarou o rexedor, lembrando que na zona xa se realizaron melloras previas, como a ampliación do parque infantil e a mellora do aparcamento lindeiro, co obxectivo de "mellorar a vida dos cidadáns".

Orzamentos europeos

A peonalización conta cun orzamento de 375.000€. Estes fondos serán achegados grazas ao Convenio Interadministrativo entre a Axencia Turismo de Galicia e o Concello da Guarda, enmarcado no Plan de Sostibilidade Turística en Destino da Guarda.

A actuación finánciase con cargo ao Plan de Recuperación, Transformación e Resiliencia, mediante os fondos Unión Europea-NEXTGENERATIONEU.

Como traballo previo á peonalización, xa comezaron os labores de mellora da integración paisaxística do muro de pedra da rúa Rosalía de Castro, cun orzamento de 48.050€.