Muxía acolle o III Foro de Internacionalización do Camiño Fisterra-Muxía, un encontro que reforza a súa dimensión social e internacional

O Parador da Costa da Morte acolle hoxe a terceira edición do Foro de Internacionalización do Camiño Fisterra-Muxía, unha cita xa consolidada que cada ano percorre un dos dez concellos que integran a asociación promotora da ruta. O encontro mestura visión local e perspectiva global cun programa de mesas de diálogo e relatorios centrados no impacto social do Camiño. Nesta edición participan concellos, empresas culturais, proxectos comunitarios e voces expertas do ámbito estatal e internacional, reforzando o papel do foro como lugar de reflexión estratéxica. Á inauguración acoden Xosé Regueira, vicepresidente da Deputación, e Antonio Leira, deputado de Deportes, Mocidade e Camiños; Ildefonso de la Campa, director do Xacobeo; María Luisa Rodríguez, presidenta da Asociación de Concellos do Camiño Fisterra-Muxía e Javier Saar, alcalde de Muxía. Unha mostra do apoio institucional que sostén o evento.

A organización quere poñer este ano o foco no labor das técnicas de turismo municipais, maioritariamente mulleres, cuxo traballo diario é clave para a promoción e xestión da ruta. O programa inclúe tamén unha mesa dedicada a proxectos transformadores do territorio, como Horta Creativa, centrada na dinamización comunitaria; Arte no Camiño, que converte a paisaxe nun espazo artístico aberto; ou Chicha Lovers, iniciativa recoñecida pola súa aposta innovadora pola gastronomía e a identidade local. O foro contará ademais coa intervención do director do ICTE, Fernando Fraile, que analizará o peso das certificacións na modernización dos destinos, e cun relatorio sobre o patrimonio inmaterial do Camiño a cargo do historiador Fernando Alonso Romero.

A dimensión internacional tamén está presente a través de profesionais convidados de Irlanda, Inglaterra e Portugal, que achegan modelos de comunicación, promoción e cooperación transfronteiriza. O financiamento e os instrumentos de apoio ao territorio serán outro dos eixos da xornada, cunha mesa específica protagonizada polos GALP Costa da Morte e Costa Sostible. Tras tres edicións itinerantes, o Foro de Internacionalización do Camiño Fisterra-Muxía consolídase como un espazo imprescindible para profesionais, entidades e veciñanza, onde o territorio cobra voz e o Camiño se entende como ferramenta de cohesión e desenvolvemento sostible. A xornada pechará coa clausura institucional e cunha actuación musical acompañada dun viño de convivencia, símbolo do espírito hospitalario da ruta.