A Radio Conta 2025 volve unir as emisoras da Coruña nunha viaxe radiofónica solidaria
Sete emisoras públicas e privadas da Coruña realizarán un programa conxunto o sábado 27 de decembro ás 17h na Fundación Barrié, a beneficio de Accem e cunha ollada á radio galega na diáspora
Moncho Viña, presentador de A Radio Conta
El código iframe se ha copiado en el portapapeles
A Coruña
O programa A Radio Conta regresa este Nadal de 2025 para celebrar a súa decimoterceira edición, consolidándose como un dos grandes eventos radiofónicos da Coruña. Un ano máis, as principais emisoras da cidade únense nunha emisión especial que combinará radio en directo, música, humor e compromiso social, cunha mirada posta na emigración galega de ida e volta.
A cita será o sábado 27 de decembro, de 17h a 20h, na Fundación Barrié da Coruña, con entrada libre para o público e emisión simultánea a través das radios participantes.
Sete emisoras da Coruña, un único programa
Nesta edición, sete emisoras públicas e privadas da Coruña volverán traballar de maneira conxunta nun evento único no panorama radiofónico galego:
RNE (encargada da cobertura técnica), Radio Galega, Radio Coruña Cadena SER, Onda Cero, RadioVoz, COPE e Radio Marca.
Como cada ano, o xornalista Moncho Viña será o encargado de conducir un amplo equipo de profesionais das diferentes emisoras, nun formato dinámico que mesturará entrevistas, música en directo, radioteatro e sorpresas.
A radio como ponte coa diáspora galega
Un dos eixos centrais de A Radio Conta 2025 será o papel da radio na emigración galega, cunha conexión moi especial con Montevideo. O programa establecerá unha ligazón en directo con Radio Oriental, emisora que leva emitindo desde 1950 o histórico espazo Sempre en Galicia, o programa en galego máis lonxevo da radio mundial, que celebra este ano o seu 75º aniversario.
Sobre a importancia da radio como vínculo entre Galicia e a diáspora participarán o director Xan Leira, a xornalista Mónica Rebolo e o profesor Henrique Rabuñal. Pola súa banda, a académica Ana Romaní abordará a figura da xornalista Begoña Caamaño, homenaxeada no Día das Letras Galegas 2026.
Radioteatro, divulgación e voces destacadas
O guionista Óscar Cruz inspirarase en emisións en galego na diáspora para crear dous pases de radioteatro en directo, nos que participarán, entre outros, a alcaldesa da Coruña, Inés Rey, e os voceiros municipais Miguel Lorenzo (PP) e Francisco Jorquera (BNG).
Tamén subirán ao escenario os actores Luis Iglesia e Santiago Fernández, que renderá homenaxe ao dramaturgo Manuel Lourenzo. A divulgación chegará da man de Iván Fernández Amil, con inventos galegos sorprendentes, e de Óscar Blanco, cazador de eclipses, que adiantará o fito astronómico que vivirá A Coruña no 2026.
O humor correrá a cargo de Xosé Antonio Touriñán, David Perdomo e Leti da Taberna.
Música e homenaxes nun programa especial
No apartado musical, A Radio Conta 2025 contará coa participación de José Manuel Cancela, fillo de emigrantes galegos e gañador de cinco Premios Emmy. O programa renderá tamén homenaxe a Sito Sedes, coa presenza dos seus fillos Montse e Carlos, ademais do músico Xurxo Souto e de Noly, actual cantante da orquestra Los Satélites.
Completará o cartel musical Igor Pérez, que ofrecerá ao público o seu estilo crooner.
A Radio Conta, solidaria con Accem
Nesta decimoterceira edición, A Radio Conta quere dar visibilidade ao labor de Accem, organización que traballa na atención, acollida e integración das persoas migrantes en Galicia e en toda España. A través de programas de formación e inserción sociolaboral, Accem acompaña a persoas que chegan en busca dun futuro mellor.
Durante o evento daranse a coñecer historias reais de persoas beneficiarias e o traballo diario da entidade. Quen queira colaborar pode facelo a través do Bizum 04939, seleccionando a opción “Doar a ONG”.
