A Coruña fai xustiza con Arsenio Iglesias

A Coruña

O que foi xogador e adestrador do Deportivo Arsenio Iglesias recibirá este venres a homenaxe que A Coruña desexa render a un dos personaxes sen os que non se explica a historia recente desta cidade. O temoneiro do ' Superdepor' vai ser recoñecido como Fillo Adoptivo da cidade, nun acto que terá lugar no Palacio de María Pita ás oito da tarde.

Non vai ser o único recoñecemento que reciba o de Arteixo. Un espazo onde forxou a lenda do equipo branquiazul, a Cidade Deportiva da Torre, levará o nome dun técnico que, ademais de títulos, soubo gañarse o agarimo de todo afeccionado ao fútbol. Porque Arsenio non só dirixiu maxistralmente un equipo que desafiou aos grandes do panorama nacional. Tamén acuñou unha maneira de analizar o fútbol plena de ' sentidiño' e non exenta de 'retranca'.

Este venres será a quenda para que Arsenio Iglesias recolla o recoñecemento como Fillo Adoptivo. Para máis adiante queda outro acordo da corporación municipal reunida en pleno o pasado 16 de xaneiro: a de dedicar unha das rúas da Coruña a alguén que significa moito máis que un mero adestrador para o deportivismo.

No acto estará presente o propio Arsenio que, a pesar dos seus 89 anos e o seu delicado estado de saúde, non se quere perder o acto. Unha homenaxe que se celebrará no edifico onde ofreceu á cidade o primeiro título dun modesto equipo que, anos despois, faríase moi grande coa semente plantada no seu día por Arsenio Iglesias.