Conclúe a exhumación no cemiterio de San Froilán

Lugo

Concluíron xa os traballos de exhumación dos restos de 30 persoas enterradas polos servizos sociais en 1989, uns labores que viñan desenvolvéndose desde o luns na zona vella do cemiterio municipal. A tarefa foi especialmente laboriosa, pois os restos atopábanse sepultados directamente en terra, algo prohibido pola lei actual, e foi necesario separar coidadosamente madeira, cristal e outros materiais dos restos humanos.

Segundo conta Jorge Balado, xerente do tanatorio Serfuja -a empresa encargada da exhumación- os restos atopábanse a un metro de profundidade e agora, separados e adecuadamente identificados, gardaranse seis meses nun almacén e a continuación pasarán ao osario común. Concluída a exhumación, na zona construiranse 30 novas sepulturas que darán cabida a 90 corpos.